兆雄成長於元朗雞地，幼年家貧，每逢打風下雨家裡必會水浸，甚至屋頂試過整個被吹走。「我哋就帶住啲蓆同被去人哋未入伙但實淨啲嘅單位打地舖。」身為長子的他自然要幫忙照顧弟妹，小學畢業後，便出來工作，直至退休。他沒半點埋怨，彷彿一切本應如此。即使後來患癌，也沒有怨天尤人，而是康復後成為義工。他笑道：「醫生叫你唔使驚，你邊聽得入耳？但我哋唔同，我哋係過來人。」

兆雄第一份工作是和同學一起在上海餐廳學師，後來發現難有晉升空間，便果斷轉行學整麵包，當時他只是15歲。頗有天份的他，用了兩三年時間已能獨當一面，一做便是廿年。「份工就唔係太辛苦，不過工時長，好難請假，過時過節又忙。」於是喜歡駕車的他把心一橫，考了車牌做的士司機。「收入高啲，又可以周圍走，唔使每日淨係對住個餅房。」兩年後，兆雄索性轉為中港貨車司機，走更遠的路。來回一次大概三小時，有時因為過關程序久了，大半天便過去，但兆雄還是樂在其中：「好似人哋自駕遊噉，周圍去幾開心。」不過其後治安轉差，他便只留在香港當貨車司機。「即係咩跌錢黨、午夜分屍，傳嚟香港前，我哋都經歷晒。」兆雄分享，途中若有人截車，大家必不會停。「試過有人停，人哋一上車就隊把刀埋嚟㓤你。」直到健康出現問題，兆雄才退休，那年他62歲。

現時居住天水圍，一生也在元朗度過的兆雄指頗喜歡這區。「不過就懷念以前多啲。細個元朗嘅生活真係好閒適，朝早7:00大馬路仲係好靜㗎，但369墟市好熱鬧，有人賣豬呀雞呀，啲小朋友又通處走，仲見過有人即場閹雞同劏蛇......」聊起舊時，兆雄津津有味。「新開嘅Yoho Mall我好似只係行咗兩三次，我鍾意行舊舖多啲。太城市化，好似度度都一樣，冇乜意思。」