身穿粉紅色T-shirt，剪了一頭舒爽短髮的黃潔雲，雲雲說：「我驚我會講到喊。」在皇后大道東出世和長大的她，對這個地方充滿感情。她如數家珍地講出從前種種，彷彿一切從未消逝，依舊鮮活地存在於她的世界：「我只要瞇埋眼，就會見到灣仔嘅景物。」

家裡開士多，前舖後居，她和父母、爺爺、嫲嫲、姨婆、叔父、姑姐兄姊等共十幾人一起居住，好不熱鬧。身為么女，她毋須擔起養家或照顧誰的責任，卻也不是萬千寵愛的小公主，親戚的刻薄對她的童年造成某些陰影，幸好無損她對灣仔的喜愛。講起從前，她語調愉快：「逢星期日會去四婆屋企玩，都係喺皇后大道東，佢會請我食紅豆冰，仲有拳頭包，真係好似拳頭咁大，有啲類似而家嘅豬仔包，外脆內軟，真係諗起都流口水。」無法忘懷的還有醴棧酒莊：「伯父成日喺嗰度買酒飲」以及三寶茶樓：「就喺我屋企對面，朝早成日好多人拎埋啲雀去飲茶，啲雀就吱吱吱噉叫……」誠如雲雲所言，灣仔區一直活在她的心中。

她也在這裡經歷了青澀的戀愛。「係我哥哥啲波友嚟，嗰時我間房會望到佢屋企露台，有時我就喺床嘅窗邊同佢對望，咩都冇做㗎，但已經覺得好甜。」後來17歲中學畢業後她開始到超群餅店工作，仍是在灣仔區。生活忙碌加上對方沒有進一步行動，感情自然丟淡。

灣仔區是她青春的印記，一直到嫁人為止，她都在這裡生活。「見住灣仔嘅變遷我好傷心，我讀嘅幼稚園、小學同中學都冇晒了。以前船街條樓梯好闊，而家淨返好少。好多嘢你都唔會再搵得返，佢永遠都唔會再有機會喺你眼前出現。」傷感之情溢於言表，但雲雲也笑說：「都有好嘅轉變，而家灣仔啲人高尚同有禮貌咗好多，你唔會再見到有人飛劍（吐痰）或者着睡衣踢拖落街。」

留着一頭貼服銀白短髮的簡翠金，（金金），以爽朗聲線分享兒時在街市成長的故事，說到有趣之處不時哈哈大笑。家人在灣仔開魚檔，她自小便要幫忙，甚至需放下學業，但她上演的不是苦情戲，過程中重覆說着的是：「其實我童年真係過得好開心！」

金金小學開始便在檔口搣蝦肉，在街市逗留的時間可能比在家裡還多，見盡各種光怪陸離之事：醉酒水兵、企街妓女、食大煙的二世祖、黑幫、小販管理隊捉鬼後由不會被罰的小朋友頂罪、不懂事的小孩把用過的安全套吹成水彈投擲、小偷被發現後不會交給警察而是由街坊私了……對年幼的金金來說，一切都不可怕，只覺新奇有趣，後來亦成為她的日常。「細個冇王管，周圍走。 大多數人都好友善，我去送貨啲廚師會請我食嘢，以前循道衛理嗰頭係水兵宿舍，佢哋成日會掉啲糖落嚟，街邊啲姐姐仲成日請我哋食糖。」金金的童年充滿着自由與甜味。

但有光的地方便有影，人生不可能沒有陰暗。金金的父親嫖賭飲盪吹樣樣精，母親婚後才知丈夫在鄉下早有另一頭家，雖然在魚檔辛勤工作，卻始終沒有餘錢。金金說：「我有諗過帶媽咪一走了之，但嗰個年代都係要靠男人，唔係會畀人蝦。」小學畢業以後，金金選擇不升學，正式到魚檔幫手，由買貨到劏田雞都要學習：「你見住阿媽咁辛苦，唔會忍心，當早啲出嚟賺錢囉。」金金說母親不識字，但那份堅毅與勤力是她的榜樣。「而且阿媽好錫我。」

母親在60歲時退休，金金正式擔大旗，婚後依然工作。「我唔可以做家庭主婦㗎，要我嫁人要接受到呢樣先得。」金金當時已相當前衛，可能與早當家有關。一晃眼，金金也退了下來，魚檔亦已易手。但講起從前，還是一臉懷念：「最掛住灣仔以前嘅人情味同熟悉嘅街道囉。」

梳着八二分界一頭銀髮的凌榮光，（ Alan），配戴琥珀色幼框眼鏡，以沉穩聲講起當年，依舊散發着一身書卷氣。

成長於西營盤的Alan讀書成績甚佳，小學畢業以後順利考上名校喇沙書院，卻因父親一句：「貴族學校嚟喎」便不了了之，後來再考上另一名校聖類斯中學，信奉民間宗教的父親這次又說了句：「你去讀耶穌學校？」就這樣Alan兩次與精英學校擦身而過。年少的Alan並不太懂這些，最終入讀了伯南英文書院。「讀到F.3時，有新同學加入，佢哋都係因為成績唔夠好而被名校篩出嚟。我喺學校一直都考頭三名，但直到遇上佢哋先知道咩係真係勁。」Alan這時才感受到名校不只勝於擁有更多設施和地方，也不只是多了不同課堂如音樂課或是不同課外活動，名校從不同的方式栽培學生，Alan第一次感受到自己和那些名校出身同學的差別。「又唔係話好介懷，但有時都會諗，如果當初自己都入咗去讀，今日會唔會又有啲咩唔同呢？但係我其實都好proud of 讀伯南。」

一位理科老師曾對Alan說：「人一定要勤力。你而家做唔到，唔代表將來做唔到。」這成為了影響他一生的說話。Alan沒有受困於自身的限制，反而一邊工作一邊修讀會計，最終成為會計師之餘，更曾擔任各大專院校的導師。寶石到哪裡始終都會發光，Alan沒有辜負自己。

談起成長的灣仔區，Alan以：「係舊式香港嘅縮影」來形容。他說這裡甚麼也有：傳統街市、街邊小檔、高級商廈、平民和高尚住宅……燈紅酒綠，聲色俱全，機會處處。大概就像他的人生，只要你願意，總能闖出一片天。

身穿粉紅色T-shirt，剪了一頭舒爽短髮的黃潔雲，雲雲說：「我驚我會講到喊。」在皇后大道東出世和長大的她，對這個地方充滿感情。她如數家珍地講出從前種種，彷彿一切從未消逝，依舊鮮活地存在於她的世界：「我只要瞇埋眼，就會見到灣仔嘅景物。」

家裡開士多，前舖後居，她和父母、爺爺、嫲嫲、姨婆、叔父、姑姐兄姊等共十幾人一起居住，好不熱鬧。身為么女，她毋須擔起養家或照顧誰的責任，卻也不是萬千寵愛的小公主，親戚的刻薄對她的童年造成某些陰影，幸好無損她對灣仔的喜愛。講起從前，她語調愉快：「逢星期日會去四婆屋企玩，都係喺皇后大道東，佢會請我食紅豆冰，仲有拳頭包，真係好似拳頭咁大，有啲類似而家嘅豬仔包，外脆內軟，真係諗起都流口水。」無法忘懷的還有醴棧酒莊：「伯父成日喺嗰度買酒飲」以及三寶茶樓：「就喺我屋企對面，朝早成日好多人拎埋啲雀去飲茶，啲雀就吱吱吱噉叫……」誠如雲雲所言，灣仔區一直活在她的心中。

她也在這裡經歷了青澀的戀愛。「係我哥哥啲波友嚟，嗰時我間房會望到佢屋企露台，有時我就喺床嘅窗邊同佢對望，咩都冇做㗎，但已經覺得好甜。」後來17歲中學畢業後她開始到超群餅店工作，仍是在灣仔區。生活忙碌加上對方沒有進一步行動，感情自然丟淡。

灣仔區是她青春的印記，一直到嫁人為止，她都在這裡生活。「見住灣仔嘅變遷我好傷心，我讀嘅幼稚園、小學同中學都冇晒了。以前船街條樓梯好闊，而家淨返好少。好多嘢你都唔會再搵得返，佢永遠都唔會再有機會喺你眼前出現。」傷感之情溢於言表，但雲雲也笑說：「都有好嘅轉變，而家灣仔啲人高尚同有禮貌咗好多，你唔會再見到有人飛劍（吐痰）或者着睡衣踢拖落街。」