建珍洋名為Melody，席間笑說自己貪玩，若年輕時沒有加入工會聯誼跳舞，可能便會在外學壞。

建珍於香港出生，沒有與大陸的父母同住，而是交由婆婆與舅父照顧，後來婆婆去世，她在17歲時便與同事在土瓜灣合租單位：「兩個工廠妹一齊住，都幾開心㗎！」她13歲起外出工作，跟師傅學習「連盤」（把毛衣不同的部分連在一起成為完整的一件衣服再出貨）：「嗰時好好賺㗎，不過會有淡季。」為了令收入更穩定，數年後建珍再學習了另一手藝「織布」，其後更成為組長，還開始接觸文書工作。「我讀到小學六年班㗎咋，不過好鍾意睇故仔書，即係啲武俠小說，就不知不覺識多咗字，人哋又教下我點做，慢慢學囉。」建珍不只好學，更會動腦筋讓工作變得更有效率：「有一年我喺間做鈕嘅公司返工，個老闆好犀利，所有嘢都記入腦，但其他人未必可以咁，我就建議不如整個樣板出嚟，方便大家溝通同工作。」正因建珍時時思考，才讓她從小小的女工，最終晉身至管理層。

建珍20歲時結婚，與丈夫先在荃灣的三棟屋居住，不久遷拆，搬到了青衣，直到如今。青衣盛載了建珍許多回憶：「記得以前返夜班，日頭梗係想抖，但兩個女成日會唔記得帶功課，又要預時間買餸煮飯，行嗰條10分鐘嘅斜路，真係好深刻。」建珍亦在這裡與丈夫離異，她難過卻沒有頹喪，反而開啟了自己第二人生——開始了追星之旅。

「我好鍾意木村拓哉，特別欣賞佢唔認輸嘅性格，為咗佢我可以特登飛去日本。」談起木村時，建珍雙眼充滿了亮光。疫情前，建珍年年都會親身到日本觀看木村的演出，更試過一年飛四次。不僅如此，她更為了偶像學日文。那份追星的熱情，相信比起如今的Mirror粉絲也過之而無不及。而她對木村的愛可見於以下驚人的發言：「木村上鏡唔靚！」正當在場人士無不訝異於俊俏如雕塑的木村怎會落得如此評價，建珍續說：「佢真人靚好多！」眾人立時會心微笑。女兒看見母親的活力，在經濟和心靈上亦大大力支持母親，堪稱佳話。

面容硬朗，連坐姿也堅挺直立的梁泉過去是警察，在貪污成風的七十年代出學堂，卻堅決拒絕收取贓款。「我唔理其他人㗎，淨係做自己嘢。」拒絕同流合污的代價是被發配邊疆——在西營盤的醫院值班。「呢個位同守水塘差唔多，冇乜嘢做亦唔使旨意有得升。」但他說正好樂得清靜。後來廉政公署於1974年成立，梁泉的處境得以改善，漸漸能到任不同崗位。

1978年，梁泉被派到葵青區的警署。「當時對呢個區印象好陌生，我之前多數喺港島做嘢，新界就淨係留過喺大埔約一年，都係相對靜嘅區域。嚟咗之後發覺呢度每日都好多事發生：打劫、打交、黑社會乜都齊，最多係毒品，好忙好多嘢做。」梁泉分析葵青區如此品流複雜，可能與當時的人缺乏教育及多為低下階層的緣故。

一直被投閒置散的梁泉找到了發揮所長的機會，除卻盡警察的職份外，還會花心機幫助遇到的每一個個案：「舊時未有社工，唔似而家分得好開，有咩就轉介，以前差人會做埋社工嗰份。」譬如不少父母會帶同不聽話的子女前來警署，希望「阿sir」幫忙管教；又有家暴或虐兒的個案，需要警察介入家庭之中充當和事佬。甚麼奇形怪狀的事都會遇上：「某日有個太太嚟到喊苦喊忽，我哋好緊張以為咩事，原來係佢老公寧願同隻狗女瞓，都唔肯同佢同床。我哋唯有車個太太返去，再勸下佢老公，盡下人事。」不過梁泉遇到最多的還是吸毒者，他總會勸他們：「吸毒唔平㗎，廿幾蚊先得一粒，你食隻雞都叫有益呀。」

雖事隔多年，但梁泉指在葵青區工作的日子讓他學懂了處理各種光怪陸離的事，增強了待人接物的能力，於他日後的在職生涯相當有益。